Ar peurvan-bihan
E traoñ ar park gounezet «Ar Brugeier» ez eus ul lodenn vihan anezhañ
dilezet. Re c’heuniek eo an dachenn ne vez ket darempredet e-pad ar goañv. A-nebeudoù, bodoù gwern a varell ar peuriñ dispartiet diouzh ar park bras gant un orjal dreinek. Koulskoude, dieub eo an tremen etrezek ar garront hag an ti-feurm : «Ar Gelenne ». Kement ha ken bihan ma vez ret diwall ar saout e-barzh pa vez dizouret an douar.
- Daoulagad-ar-Werc’hez miz even tro-dro d’ar wazh (Lucien Pouëdras)
Treuzet eo ar peurvan en e greiz gant un don a wazh deuet eus an atant tost. A-hed ar goañv eo andoniet mat ur poullig ganti. Met adalek miz Gouere betek fin an diskar-amzer e ya da hesk ar vammenn. E-pad ar vakañsoù e klaskomp lammat a-hed o tremen dreist anezhi hep poan. Met n’eo ket ken laouen Ripe ar c’hi gant ar c’hoari. Ne blij ket dezhañ lammat e-unan. Neuze, eo ret dezhañ lammat en hor c’hichen staget berr gant ur gordenn. Blaz ar c’hevezerezh a zo ganeomp hag ar wazh n’eo ket ledan a-walc’h. Renket e vez ganeomp drez ha spern war an tu all d’ar foz. Rankout a ra ar c’hi-sportel astenn e lamm kuit da vezañ toull-didoull e bavioù. Ne vezemp ket ni merzheriet er memes mod avat, gwarezet ma vezemp gant hor botoù-lêr-koad. Diskiant d’ar poanioù gouzañvet gant hor mignon e ouzhpennemp bernioù drez war-lerc’h pep lamm deuet da vat. Gourc’hemennet ha poket dezhañ gant ar vugale-c’houez ne grede ket al lammer dreist klemm re war e stad.
Tro-dro d’ar bloavezhioù 1930, ma mamm a veze o tiwall an tropellad en ur sevel lochoù e-kreiz ur c’harzhad kelvez. Meur a vloavezh diwezhatoc’h e ra kaoz eus an hevelep tra gant ma mignon Roger. Ma c’henitervezed a zeu gant o merc’hodennoù savet ganto. N’o deus ket o far evit aozañ margodennoù gant delioù a zo en-dro d’un dañvouezenn vaiz. Ar blev liesliv a-us d’an dañvouez a c’hoari evel blev o c’hrouidigezhioù. E saozneg e vez graet « Corn husk doll » eus seurt margodennoù hep bizaj kavet abaoe pell amzer e Amerika. Hiziv ez eus ur gouel bras kuzhet eus selloù an dud vras.
Mais le vert paradis des amours enfantines,
L’innocent paradis, plein de plaisirs furtifs...
Baudelaire.
- Ar saout pennfollet...(Lucien Pouëdras)
Arnevek eo ar beure. Flemmet gant ar c’helien, ar saout a ya e vreskenn. Hag int d’an daoulamm tro-dro d’ar pradig en ur vlejal, o wintañ o revr, o lostoù plumachennet savet uhel. Ul lamm buoc’h a-gleizh, unan all a-zehoù. A-greiz-holl setu unan o vont kuit dre an toull-ode. Hag ar re all war he lerc’h. An aon a grog ennon ha n’hallan ket mirout outo da vont etrezek ar c’hraou lec’h ma n’int ket gortozet ken abred. N’o deus ket tapet o gwalc’h a c’heot. Ha me da erruout gwall-bitous dirak ma mamm-gozh. Ret eo din anzav n’eo ket bet gouest ar paotr-saout da herzel ouzh an tropellad. C’hwerv-put eo al laezh-ribod e souban bara kraz ennañ. N’on ket dellezek da zebriñ ur meuz a zo un digoll eus ma labour. N’on ket diouzh renk ma hendadoù !